Сімвал Слоніма і свята. Талісманам рэспубліканскага свята "Дзень беларускага пісьменства" ў Слоніме стане львяня з прыгожым беларускім імем Лявон

Сімвал Слоніма і свята.  Талісманам рэспубліканскага свята "Дзень беларускага пісьменства" ў Слоніме стане львяня з прыгожым беларускім імем Лявон

Ужо ў бліжэйшы час львяня ўвасобіцца ў самых розных варыянтах.

Яшчэ увесну ў раёне абвясцілі конкурс талісманаў і слоганаў свята, удзел у якім прынялі асобныя аўтары і калектывы. Паступіла шмат цікавых прапаноў. У выніку слоганам стане выраз “ЛІТАРАльна наш Слонім” у розных варыяцыях: “ЛІТАРАльна наша свята”, “ЛІТАРАльна наша мова” і гэтык далей. Яго абыграюць на самых розных пляцоўках. Аўтар слогана – галоўны спецыяліст аддзела ідэалагічнай работы і па справах моладзі Слонімскага райвыканкама Наталля Ганчарук.

79c4ad439d24b03031ae18951234d6db.jpg

Калі казаць пра талісманы Дня беларускага пісьменства, фаварытамі былі два – львяня і слон. Здавалася б, жывёлы для Беларусі не характэрныя. Слон меўся абыграць назву горада – Слонім. 

talisman.png
Праўда, паходзіць яна не ад жывёлы, таму журы аддало перавагу льву. Цар звяроў куды больш звязаны са Слонімам. Гэты талісман прапанаваў калектыў яслей-сада №14 горада Слоніма.

– Калі задалася пытаннем, што магло б быць сімвалам нашага горада, адразу прыйшоў у галаву леў. Менавіта ён намаляваны на гербе Слоніма, – распавяла аўтар ідэі, справавод садка Алёна Лойка. – Але хацела не проста паўтарыць тое, што ўжо ёсць, а нейкім чынам звязаць яго з Днём пісьменства. Таму вырашыла дадаць кнігу, як галоўны сімвал свята, і карону.

Талісман Лявон адсылае адразу і да гісторыі горада. Герб са львом, які трымае стралу (фрагмент герба “Ліс” роду Сапег), быў зацверджаны яшчэ ў 1591 годзе. І паказвае ён на тое, што горад належаў Льву Сапеге.

3cdd19058927099992dafc0f6f827b63.jpg

– Да свята будуць пашыты роставыя лялькі Лявона, іх плануецца тры. Яны будуць запрашаць гасцей на падворкі, гуляць з дзецьмі, з імі можна будзе сфатаграфавацца… Адным словам, яны дакладна дададуць яркіх фарбаў Дню пісьменства, – адзначыла намеснік старшыні Слонімскага райвыканкама Тэрэса Юшкевіч. – Да таго ж, выява талісмана свята ў Слоніме нароўні з агульным лагатыпам Дня беларускага пісьменства будзе вакарыстоўвацца на рэкламнай прадукцыі. З’явіцца ён і на сувенірах.