Удзельнік Летняй школы беларускай мовы і культуры, жыхар Германіі Аляксандр Курэк расказаў, навошта ён вучыць беларускую мову і чаму любіць Гродна

Летняя школа беларускай мовы і культуры арганізавана на базе Гродзенскага дзяржаўнага ўніверсітэта імя Янкі Купалы і праходзіць ужо ў трэці раз. Упершыню школа была рэалізавана ў 2019 годзе: тады удзел у вывучэнні беларускай мовы і знаемстве з культурай беларускага народа прынялі тры чалавекі. У 2022 годзе колькасць удзельнікаў узрасла да пяці чалавек, а сёлета ў Летняй школе навучаюцца ўжо дванаццаць удзельнікаў. Сярод іх сем студэнтаў, тры выкладчыкі і два аспіранты.

– Стварэнне Летняй школы беларускай мовы і культуры было абумоўлена тым, што напрыканцы 2017 года наш універсітэт сумесна з філалагічным факультэтам Маскоўскага дзяржаўнага ўніверсітэта імя Міхаіла Ламаносава стварыў цэнтр беларускай мовы, літаратуры і культуры якраз на базе Маскоўскага ўніверсітэта, – адзначыў дырэктар навуковай бібліятэкі ГрДУ імя Янкі Купалы, кіраўнік Летняй школы беларускай мовы і культуры Мікалай Грынько. – Праграма нашай школы, распрацаваная на два тыдні, у першую чаргу ўключае ў сябе заняткі па беларускай мове і літаратуры, лекцыі па гісторыі беларускай культуры. Другая ж частка працоўнага дня адводзіцца на вандроўкі, экскурсіі, знаёмства з горадам Гродна, яго гісторыяй і на многае іншае.

«З цікавасцю да новага»

Актыўны ўдзел у працы Летняй школы беларускай мовы і культуры прымае жыхар Германіі, магістрант Гейдэльбергскага ўніверсітэта Аляксандр Курэк. Прычым наведвае Летнюю школу малады чалавек не ўпершыню, праўда, ў мінулым годзе ён вывучаў рускую мову.

– Некалькі год таму я ўбачыў аб’яву ў інтэрнэце аб тым, што ў Беларусі, а менавіта ў горадзе Гродна, ёсць магчымасць наведаць такую школу, дзе не толькі вучаць мове, але і знаёмяць з культурай краіны. Да гэтага я ніколі не быў у Беларусі, таму вырашыў паспрабаваць. Чаму не? Мне хацелася проста ўбачыць, як там усе выглядае, якія людзі, што цікавага ёсць у гэтай краіне. У першы раз я абраў для вывучэння рускую мову, а сёлета вырашыў пашырыць веды і пачаў вывучаць беларускую, – расказаў Аляксандр Курэк, што цікава, на дастаткова прыгожай і правільнай для замежніка беларускай мове.



Цікавасць да розных моў у Аляксандра невыпадковая: у Германіі малады чалавек навучаецца на неафілалагічным факультэце, таму з задавальненнем адкрывае для сябе новыя мовы свету.

– Мая родная мова – нямецкая. Калі вучыўся ў школе, то з цікавасцю вывучаў англійскую. Пасля ўзнік інтарэс да славянскіх моў. Паспрабаваў рускую, польскую, цяпер прыйшоў час для беларускай мовы. Наведванне Летняй школы і вывучэнне новай для мяне мовы – гэта новы цікавы досвед і незабыўныя ўспаміны. Канешне, славянскія мовы вылучаюцца сваёй спецыфікай і пэўнай складанасцю, але мне было лягчэй пачынаць вывучаць беларускую мову, таму што я ўжо разумеў рускую і польскую, – адзначыў Аляксандр.

Практычнае засваенне

Як адзначыў Аляксандр, цяжкасці ў вывучэнні беларускай мовы маюць сваё месца, але прыемнага ў гэтым адукацыйным працэсе значна больш. Так, малады чалавек расказаў, што яго вельмі ўражвае тое, наколькі беларуская мова можа быць падобная да іншых славянскіх моў, і як яна адначасова розніцца з імі.

– Маю цяжкасці з беларускім вымаўленнем. З рускай мовай у гэтым плане мне было трошкі прасцей. Але ў беларускай мове мне вельмі падабаецца сустракаць арыгінальныя словы, якіх больш нідзе не сустрэць. Напрыклад, чыгунка, – з усмешкаю адзначыу Аляксандр. – Яшчэ мне падабаецца, што адукацыйны працэс тут, у Беларусі, мае падабенства да нашага працэса у Германіі. Але за гэты час я ўжо магу адзначыць, што ў вас большая ўвага надаецца менавіта практычнаму засваенню матэрыялу. Што для мяне, напрыклад, пры вывучэнні незнаёмай мовы вельмі добра.

Асобна малады чалавек адзначае манеру падачы навуковага матэрыялу выкладчыкамі ГрДУ імя Янкі Купалы. Па яго словах, кожная лекцыя вылучаецца асаблівай пяшчотай і зацікаўленасцю.

«Не пакіну вывучэнне беларускай мовы»

– Памятаю, што калі я вырашыў прыехаць у Гродна ўпершыню, то амаль не ведаў нічога пра тое, як тут уладкаванае жыццё, якія людзі жывуць у Беларусі. Мала ведаў і пра вашы культурныя каштоўнасці, таму што Гродна ў Германіі малавядомы горад. Але, прыехаўшы сюды, я амаль адразу знайшоў сяброў, наладзіў зносіны з выкладчыкамі, студэнтамі ўніверсітэта. Мяне вельмі гасцінна сустрэлі, паклапаціліся пра тое, каб я навучыўся арыентавацца на гэтай мясцовасці, – расказаў Аляксандр Курэк.

Пазнаёміўшыся з беларускай культурай, Аляксандр у мінулым годзе нават прывёз з сабою ў Гродна сябра з Германіі, з якім ён разам прыняў ўдзел у працы Летняй школы. Па словах Аляксандра, толькі ўбачыўшы сваімі вачыма, як жыве іншы народ, можна рабіць пэўныя вывады, фарміраваць уласнае меркаванне адносна краіны.

– Трэба пашыраць свой кругагляд. Вучыць новыя мовы, знаёміцца з новымі людзьмі, насычаць сваё жыццё цікавымі радаснымі момантамі і карыстацца ўсімі магчымасцямі для гэтага. Для сябе я ўжо вырашыў, што нават калі ў мяне не атрымаецца прыехаць сюды ў наступным годзе, то я ўсё роўна не пакіну вывучэнне беларускай мовы. Я ўжо набыў для сябе падручнік «Беларуская мова? З задавальненнем!», таму буду сам спасцігаць гэтую мову далей, – сказаў Аляксандр Курэк.

Оперативные и актуальные новости Гродно и области в нашем Telegram-канале. Подписывайтесь по ссылке!