Гродзеншчына – непаўторны куток беларускай зямлі з багатай гісторыяй. Кожны горад, кожная вёсачка тут дыхаюць таемнай спадчынай мінулага, якую нашы сучаснікі могуць вывучаць і даследаваць не толькі па папяровых гістарычных звестках, але і па фотаздымках.

У Год гістарычнай памяці ў Беларусі стартаваў сумесны гісторыка-культурны праект “Бацькаўшчына” Міністэрства інфармацыі Рэспублікі Беларусь і лаўрэата прэміі Прэзідэнта “За духоўнае адраджэнне” Уладзіміра Ліхадзедава. Пачатак праекту надало выданне аднайменнага календара, у якім прадстаўлены старадаўнія паштоўкі і фотаздымкі канца XIX – пачатку XX стагоддзяў з асабістай калекцыі аўтара.

“Гродзенская праўда” падтрымала праект і, пачынаючы з 14-га нумара газеты, адкрыла цыкл фотапублікацый, прысвечаных гістарычнай спадчыне гарадоў, гарадскіх пасёлкаў і вёсак Гродзеншчыны.

Дарэчы, калекцыя Уладзіміра Ліхадзедава налічвае каля 50 тысяч экзэмпляраў. Многія ўнікальныя паштоўкі і фотаздымкі ўвайшлі ў кнігі-фотаальбомы аўтара, сярод якіх ёсць выданні, прысвечаныя гісторыі Гродна, Навагрудка, Ліды, Свіслачы, Слоніма, Смаргоні, Ашмян. У гэтым годзе плануецца, што пры падтрымцы Гродзенскага аблвыканкама ўбачаць свет яшчэ тры фотаальбомы пра Ваўкавыскі, Іўеўскі і Карэліцкі раёны.

Праект, безумоўна, унікальны і ставіць вельмі важную і актуальную задачу – вывучэнне, захаванне і папулярызацыю гістарычнай спадчыны беларускага народа. Ён складаў аснову XXIX Мінскай міжнароднай кніжнай выставы-ярмаркі, якая праходзіла 23-27 сакавіка.

Тэатр лялек у Гродне




Гродзенскі абласны тэатр лялек быў афіцыйна створаны 1 лістапада 1980 года. Першым паказам, які ўбачылі гледачы 25 мая 1981 года, стаў спектакль "Людвіг і Тутта". У перыяд з 2011 па 2012 гг. прайшла маштабная рэканструкцыя і тэхнічнае пераабсталяванне тэатра. У тэатры з'явіліся камерная зала прыкладна на 70 месцаў, тэатральная кавярня і музей.

Біятэхналагічны факультэт Гродзенскага дзяржаўнага аграрнага ўніверсітэта




Некалі тут знаходзілася Гродзенскае рэальнае вучылішча імя цэсарэвіча Аляксея – агульнаадукацыйная сярэдняя навучальная ўстанова. У 1907 годзе рэальнае вучылішча размяшчалася ў некалькіх прыватных дамах. Асобны будынак для вучылішча быў пабудаваны на працягу 1911-1913 гг. Вучэбныя заняткі пачаліся 11 верасня 1913 года і працягваліся да пачатку Першай сусветнай вайны. У 1948 годзе будынак быў перададзены сельскагаспадарчаму інстытуту. Цяпер ён мае с у ч а с н ы в ы - гляд, захаваўшы гістарычную спадчыну папярэдняй навучальнай установы.

Гродзенскі абласны метадычны цэнтр народнай творчасці




Установа размяшчаецца ў гістарычным цэнтры Гродна, у будынку, які з'яўляецца помнікам архітэктуры XVIII стагоддзя, дзе размяшчалася адна са школ пры Дамініканскім манастыры. У 1894 годзе тут знаходзілася гарадская ўправа. На сённяшні дзень будынак прайшоў этапы рэстаўрацыі. У ім размясцілася тэхнічна абсталяваная сучасная ўстанова культуры, якая выкарыстоўвае ў сваёй рабоце навейшыя тэхналогіі.

Дом Валянціна Таўлая ў Лідзе




Сёння тут знаходзіцца аддзел Лідскага гісторыка-мастацкага музея. Дом Валянціна Таўлая быў пабудаваны ў 1926 годзе ў цэнтры Ліды. З 1944 па 2010 гг. будынак быў прыстасаваны для размяшчэння розных устаноў горада. У 2010 годзе дом пісьменніка быў рэстаўраваны ў рамках падрыхтоўкі да рэспубліканскага свята хлебаробаў "Дажынкі-2010". 22 верасня гэтага ж года адбылося адкрыццё літаратурнага аддзела Лідскага гісторыка-мастацкага музея і мемарыяльнай комнаты паэта.

Оперативные и актуальные новости Гродно и области в нашем Telegram-канале. Подписывайтесь по ссылке!