У Воранаве праходзіць бульба-фэст “Воранаўскі дранік”

Сёння водар смачных і сытных страў заклікае ўсіх у Воранава. Другі хлеб беларусаў сёння ўшаноўваюць новым святам — бульба-фэст “Воранаўскі дранік” прымае гасцей з усяго Прынёмання.

Байкі, жарты, песні і міні-пастаноўкі, выставы, конкурсы, гульнёвыя пляцоўкі… — усё сёння прясвечана бульбачцы. Свята — гэткая своеасаблівая ода бульбе і, вядома ж, людзям працы, якія штодзённа прыкладаюць намаганні для росквіту сваёй малой радзімы.

Яркае адкрыццё гастрафэсту было жартаўлівым, бо як павялося ў беларусаў: і працаваць, і адпачываць трэба абавязкова з добрым настроем. Знакамітыя дуэты вядучых Тэа і Вольгі Рыжыкавай, Гандзі і Васіля стварылі своеасаблівы батл гарадскіх і вясковых жыхароў. Але, як павялося, за святочным сталом пануе мір і згода, а сумеснае прыгатаванне страў яшчэ больш яднае людзей.

—      Мы рады бачыць вас на воранаўскай зямлі, — прывітаў гасцей старшыня Воранаўскага райвыканкама Васіль Шлык. — Наш край славіцца багатымі ўраджаямі бульбы, а сёння вы зможаце яшчэ і паспрабаваць стравы з яе ў выкананні нашых майстрыц. Смачнага свята, даражэнькія!

—      Беларуская народная культура вельмі шматгранная і багатая на самыя розныя традыцыі: песенныя, танцавальныя і таксама на традыці прыгатавання самых розных страў, — адзначыла начальнік упраўлення культуры Гродзенскага аблвыканкама Алена Клімовіч. — У гэтым годзе вядзецца праца па падрыхтоўцы навуковых матэрыялаў на ўключэнне ў спіс ЮНЭСКА традыцый прыгатавання страў з таркаванай бульбы. У рэспубліканскі спіс увайшлі працы з 75 раёнаў, з іх 8 — ад Гроденскай вобласці. Звыш трохсот чалавек з’яўляюцца носьбітамі традыцыйных рэцэптаў. Усё гэта нематэрыяльная каштоўнасць нашай культуры. У хуткім часе ў Воранаве з’явіцца музей драніка. А пакуль святкуем!

Цеста з таркаванай агародніны на галоўную сцэну даставілі на байку: вось гэта відовішча! Кульмінацыя яскравага адкрыцця свята — выпяканне першага дзеруна. Да самай вялікай патэльні запрасілі гаспадароў: старшыню Воранаўскага райвыканкама Васіля Шлыка і лідара раённага дэпутатскага корпуса Алену Ганевіч. У кухарскай справе сябе паказалі шаноўныя госці: старшыня камітэту сельскай гаспадаркі і харчавання Гродзенскага аблвыканкама Ігар Сарокін, дэпутат Палаты прадстаўнікоў Нацыянальнага сходу Рэспублікі Беларусь Віталь Ракавец, старшыня Лідскага райвыканкама Аляксандр Вярсоцкі, кіраўнік прадстаўніцтва Ніжагародскай вобласці Расійскай Федэрацыі Андрэй Дудкін, дэпутат заканадаўчага сходу Ніжагародскай вобласці Ігар Нарэнка. Пасмакаваць беларускую нацыянальную страву прыехалі і дэлегацыі з Несцераўскай муніцыпальнай акругі Калінінградскай вобласці, Марыінска-Пасадскай муніцыпальнай акругі Чувашскай Рэспублікі.

Оперативные и актуальные новости Гродно и области в нашем Telegram-канале. Подписывайтесь по ссылке!